Tulpan, Fantastic Mr. Fox, Fish Tank e Iron Man 2

2012-03-05


Semella que o inverno xa marchou e a primavera comeza timidamente. Así que para o mes de abril (xa sabes o que din del: “As chuvias de abril, tomban o boi no carril”) nada mellor que buscar acubillo no cine. E por iso este mes, en vez dunha soa recomendación, traio catro títulos ben variados e para todos os gustos.

Tulpan (2008) Estrea: 9 de abril de 2010 Director: Sergey Dvortsevoy Intérpretes: Tolepbergen Baisakalov, Ondas Besikbasov, Samal Esljamova País: Alemaña, Casaquistán, Polonia, Rusia e Suiza Xénero: Comedia Duración: 100 minutos.

Outra desas estrañas xoias que nos trouxo a pasada edición do Cineuropa. Unha comedia casaca que conta as aventuras e desventuras cotiás de Asa, un mozo recén chegado de cumplir o servizo militar que se enfronta ó día a día da vida na estepa mentres intenta buscar moza desesperadamente e atopar o seu futuro.

Humor e situacións comúns a todas as partes do globo no marco da estepa e os costumes casacos.

Fantástico Sr. Fox (2009) Estrea: 23 de abril de 2010 Título orixinal: Fantastic Mr. Fox Director: Wes Anderson País: EUA e Reino Unido Xénero: Animación, aventura, comedia Duración: 87 minutos.

Nestes tempos nos que o 3D o invade todo é un gusto enorme ver filmes como Fantástico Sr. Fox feitos ca artesanal técnica do stop motion e cunha aparencia clásica.

O filme adapta á gran pantalla unha fábula de Roald Dahl (“Charlie e a fábrica de chocolate”, “Iago e o pexego xigante”, “Matilda”) na que o singular raposo Sr. Fox decide romper a monotonía da súa vida recuperando o vello e excitante costume de roubar galiñas. Isto fai que os granxeiros da zona decidan rematar co Sr. Fox e de paso con todos os animais do bosque, que agora viven agochados debaixo do solo. Unindo as súas habilidades animais ó máis puro estilo de filmes como Ocean’s Eleven loitarán para salvar as súas vidas.

Un filme ca acción dos grandes títulos do xénero e cun humor centrado na personalidade engaiolante do Sr. Fox que gustará a todo o público e principalmente a aqueles que queiran pasar un momento divertido sen máis complicacións.

Fish Tank (2009) Estrea: 30 de abril de 2010 Director: Andrea Arnold Intérpretes: Katie Jarvis, Rebecca Griffiths, Carrie-Ann Savill País: Reino Unido Xénero: Drama Duración: 123 minutos.

Premio do Xurado no Festival de Cannes ó mellor director, Premio BAFTA ó filme revelación, Premio British Independent Film ó mellor director e á actriz novel máis prometedora, Mellor director e mellor filme da Semana dos Realizadores do Fantasporto, e un longo etcétera de premios e candidaturas.

A vida de Mia, unha adolescente que quere ser bailarina, xa é difícil de por si (a súa idade, o sitio onde vive…) e agora complícase inda máis cando o namorado da súa mai vai vivir con elas.

Cunha realización e unha interpretación feminina, a cargo da debutante Katie Jarvis, máis que salientábeis, Fish Tank realiza un retrato auténtico e realista da vida adolescente nos suburbios das grandes urbes británicas.

Iron Man 2 (2010) Estrea: 30 de abril de 2010 Director: John Favreau Intérpretes: Scarlett Johansson, Robert Downey Jr., Mickey Rourke País: EUA Xénero: Acción, superheroes Duración: 117 minutos.

E para rematar a variada sección de suxestións deste mes unha das estreas máis esperadas polos afeccionados á banda deseñada e á acción, Iron Man 2.

Agora xa todo o mundo sabe que o megamillonario empresario da industria armamentística Tony Stark é o superheroe da armadura Iron Man e inda que moitos o intentarán por todos os medios non está disposto a revelar os segredos da súa invención por medo a que caia en malas mans. Ó mesmo tempo terá que enfrentarse a viláns como o mecanizado Whiplash e o seu exército de robots asasinos. Inda que desta volta Iron Man contará ca axuda de War Machine.

Despois da exitosa primeira parte (acerto total na elección do actor Robert Downey Jr., unha historia bastante fiel á orixinal e uns efectos especiais abraiantes) a segunda parte promete máis do mesmo e en racións máis grandes (máis superheroes, máis viláns, máis rapazas bonitas, máis explosións…) e non decepcionar ós que gustaron da primeira entrega.

Acción e humor ca industria amamentística, a megalomanía e a cara escura do heroe de tema de fondo.

Vémonos nas butacas!

Artigo publicado no suplemento cultural A soeira das estrelas do jornal En momemento, editado pelo Movemento polos dereitos civís, em avril de 2010

‘Mammoth’, unha historia de infernos persoais con escasa empatía

2012-03-05


A opinión que poidamos ter dun filme depende de moitas cousas, e a cada cal máis obxectiva, dende o nosto gusto persoal ata o estado de ánimo dese día e hora en concreto. Unha destas variábeis das que depende a nosa opinión é a empatía cos personaxes da historia, a cercanía ou lonxanía das súas vidas, a posibilidade de meternos na súa pel. E precisamente isto foi o que falla para min neste filme.

Mammoth conta a historia dunha parella nova cunha filla. El, Gael García Bernal, é o programador dunha rede social de videoxogos de grande éxito, polo que pasa amplas tempadas fóra da casa realizando acordos comerciais. Ela, Michelle Williams, é cirurxá nun hospital e case sempre ten quenda de noite, polo que lle é difícil pasar tempo ca súa familia. Por todo isto a nena pasa a maioría do tempo ca súa coidadora filipina, que á súa vez ten dous fillos en Filipinas aos que fai tempo que non ve.

Tres historias cruzadas con tres personaxes que enfrontan a súa desesperación á súa maneira. Ela sufre de insomnio e é incapaz de atraer a atención da súa filla. El, de viaxe en Tailandia, comeza un romance cunha prostituta recordando un mundo de liberdade e sen ataduras no que soía vivir. E a coidadora sufre en silencio a ausencia dos seus fillos e de non podelos axudar máis que mandando diñeiro para construir unha casa nova.

O filme está ben levado, cunhas personaxes ben construidas e unha fotografía de gran calidade, mais… Mais a min as historias da parella non me chegaron, éranme alleas por completo. A única que me fixo ficar algo interessado no filme foi a historia da inmigrante filipina.

Mammoth (2009, Lukas Moodyson), candidata ao Óso de ouro do Festival de Berlín 2009, é unha historia sobre como detrás da perfección e a aparente felicidade agóchanse pequenos infernos persoais de desesperación vital.

Vémonos nas butacas!

Artigo publicado en Galiciaé o 22 de novembro de 2010.

Categories : Cinema  Cinema  Galiciaé
Tags :

O termo ‘humor negro’ queda curto para ‘Life During Wartime’

2012-03-05


Na recomendación do outro dicía que Todd Solondz era coñecido (e recoñecíbel) pola súa mistura de drama e humor negro. Mais despois de ver Life During Wartime (2009), e tendo presentes os seus anteriores traballos, coido que o termo ‘humor negro’ quédase curto para este profesional do politicamente incorrecto.

Life During Wartime é unha especie de segunda parte de Happiness (1998), mais con outros actores e actrices. Neste novo filme vemos como Joy casou co ex-mozo da súa irmá Helen, un ex-presidiario, ex-drogadicto e adicto a facer chamadas telefónicas obscenas. Pero non están pasando unha boa época e deciden deixalo durante un tempo. Tempo que ela aproveitará para visitar ás súas irmás mentres é perseguida pola pantasma dun compañeiro de traballo que se suicidou e co que tivo unha cita. Primeiro visita a Trish que, co seu home no cárcere por pederastia, busca de novo o amor, desta vez nun home normal, inda que cun fillo un tanto especial. Os fillos de Trish tamén son para dar de comer a parte: Billy está agora na universidade, Timmy, obsesionado co seu inminente bar mitzvah e coa recente revelación de que o seu pai non está morto e é un pederasta, e a pequena Chloe, permanentemente deprimida. Despois decide visitar a Helen, instalada por completo no star-system de Hollywood e apartada da familia polas súas opinións.

Se houbera que pór unha etiqueta a este filme sería a de comedia de enredos de humor negro, inda que xa dixen antes que Solondz móvese unha cuarta por riba desa definición. O director estadounidense volve a aplicarse a fondo para sorprendernos a nós mismos ríndonos de situacións e historias das que non nos reiríamos nin faríamos bromas noutra situación (nin sequera noutros filmes).

Pode que non sexa o mellor Solondz, pero mantense ao nivel agardado, Tamén é verdade que os seareiros do director esperaban algo máis que unha correcta segunda parte despois de agardar case seis anos por un novo filme.

Aquí foi estreada en cines comerciais o pasado 30 de xullo co título La vida en tiempos de guerra, así que dentro de pouco poderédela atopar no voso videoclube de confianza ou mercar o DVD.

Vémonos nas butacas!

Artigo publicado en Galiciaé o 18 de novembro de 2010.

Categories : Cinema  Cinema  Galiciaé
Tags :

‘The Last Exorcism’, unha volta de porca para remexer os nosos medos

2012-03-04


Poderíamos dicir que despois de The Exorcist (1973, William Friedkin) non se deberían facer máis filmes sobre exorcismos, que xa está todo dito e que é perder o tempo. Pero así é o cinema de xénero, sempre dando voltas sobre os mesmos temas e intentando atopar novas formas de contar o mesmo, novos puntos de vista ou novos detalles; unha e outra vez, remexendo nos nosos medos e na nova mitoloxía do terror.

E aquí é onde se enmarca The Last Exorcism (2010, Daniel Stamm) onde Patrick Fabian (premio ó Mellor actor no 43 Festival Internacional de Cinema Fantástic de Catalunya) interpreta a un exorcista descreido que realiza un documental no que conta como todo o que fai é falso. Para iso acepta o seu derradeiro traballo no que utilizará os seus trucos de sempre. Pero… claro, non podía sair todo ben, senon non habería filme.

A fita está gravada en forma de falso documental e con cámara no ombreiro, inda que estes principios traizóanse nalgúns momentos com recursos e montaxe máis propios dun filme convencional.

A pesar de estar diante dun tema sobradamente coñecido e de que parece que en todo momento sabemos o que vai pasar, o formato no que se conta e o bo facer dos autores fan que non deixemos de perder detalle durante todo o metraxe (inda que máis de un tapou os ollos nalgunha escena).

Unha nova volta de porca ó mundo dos exorcismos que xunta os ingredientes clásicos cun novo enfoque. Sangue, pescozos retortos, relixión, escepticismo e cámara no ombreiro.

Desta volta o filme tampouco é recomendable para estómagos delicados. Nótase a man do produtor e director Eli Roth (Cabin Fever e Hostel I e II).

Alguén a viu? Que vos pareceu? Aí tedes os comentarios.

Vémonos nas butacas!

Artigo publicado en Galiciaé o 12 de novembro de 2010.

Categories : Cinema  Cinema  Galiciaé
Tags :

Neds impacta ao público do Principal na presentación de Cineuropa

2012-03-04


Comeza novembro, comeza a chover a serio e, como non, comeza Cineuropa. O festival que este ano trae á capital 130 títulos de todos os xéneros e no que, entre moitos outros, 30 realizadores galegos amosarán os seus últimos traballos.

E así, sen moitos adobíos, foi a presentación. O vídeo promocional do festival, breve (e para min innecesaria) explicación do programa e o saúdo e agradecementos da concelleira de cultura e centros socioculturais, Socorro García Conde.

Inmediatamente, sen máis dilación, fomos directos ao que todos alí estabamos agardando: a proxección de Neds, o último filme do escocés Peter Mullan (director de Orphans e Las hermanas de la Magdalena, inda que tamén coñecido pola súa longa traxectoria como actor).

Neds é a historia dun rapaz escocés que nos anos 1970 pasa de ser o típico ‘listillo’ a un vulgar matón de banda da rúa. Podería explicar máis da trama, mais o filme é basicamente iso, o violento camiño polo que o rapaz vai perdendo a súa humanidade.

O filme é duro e non recomendábel para todos os estómagos. Aínda que non conta nada que non contaran xa moitos outros filmes británicos con amplo trasfondo social, a calidade do elenco e en especial do actor protagonista (Connor McCarron, Cuncha de Ouro e Cuncha de Ouro ó mellor actor no Festival de Cinema de Donosti 2010) fan que o espectador non deixe de remexerse na butaca (e non só porque algúns encontren as do Principal incómodas). A isto tamén contribúe a banda sonora de Craig Armstrong, que sen facerse notar demasiado, vai marcando o descenso aos infernos do rapaz.

Brutal, descarnada e sen artificios, Neds é un máis que digno filme para inaugurar este festival no que nos agardan todo o palmarés de Cannes, un especial musical sobre os Rolling Stones, filmes pasados por Sitges ou Donosti, fantáticos, asiáticos, retrospectivas e documentais. Raro será que alguén non atope algo do seu gusto.

E para non perderse demasiado aquí estaremos para darvos algunhas recomendacións semana a semana e para comentar entre todos os filmes que imos vendo e o discurrir do festival.

Artigo publicado en Galiciaé o 11 de novembro de 2010.

Categories : Cinema  Cinema  Galiciaé
Tags :

Soul Kitchen

2012-01-19


Soul Kitchen (2009)
Estrea: 31 de marzo de 2010

Título orixinal: Soul Kitchen
Director: Fatih Akin
Intérpretes: Adam Bousdoukos, Moritz Bleibtreu, Birol Ünel, Anna Bederke
País: Alemaña
Duración: 99 minutos
Xénero: comedia

Nin moito menos vai ser unha constante, mais este mes tamén traio aqui un filme que se puido ver no festival compostelán Cineuropa e que, dentro da Sección oficial, tivo moi boa acollida entre o público. De feito o realizador alemán de orixe turca Fatih Akin é un asiduo deste festival e doutros nos que gusta ver a realidade dende outros puntos de vista. No festival italiano de Venecia recibiu dous premios: o especial do xurado e o Premio de cinema novo, ademáis de optar ó León de ouro.

Desta volta Akin volve ós seus temas de sempre (a inmigración, a música, as relacións humanas, o amor, a busca da propia identidade) pero dende un prisma case descoñecido nel como é a comedia lixeira. Os seus dous filmes de máis sona son Contra la pared (Gegen die Wand, 2004), e Al otro lado (Auf der anderen Seite, 2007), dous dramas de fondo contido social. Inda que tamén ten outros como Cruzando el puente: Los sonidos de Estambul (Crossing the Bridge: The Sound of Istambul, 2005) un documental musical onde xunta dous dos seus grandes temas: a música e Turquía.

O protagonista de Soul Kitchen é Zinos, un mozo alemá de orixe grega, que rexenta un ruinoso restaurante nun vello almacén do barrio Willhelmsburg de Hamburgo, e inda que a comida non é moi alá ten certo éxito entre os veciños da zona polo seu particular ambiente (especialmente a música). Mais a vida de Zinos está chea de atrancos e de situacións máis ou menos cómicas (sempre depende dende o punto de vista que miremos, a el fixo que non lle fan moita gracia). E así se van sucedendo os acontecementos sin que o bo de Zinos poda facer nada. A súa moza marcha a China a traballar de correspondente dun xornal. Debería visitala ou ir vivir con ela? Coñece a Shayn Weiss, un cociñeiro de luxo, que dará un xiro radical á cociña do establecemento, facendo que sexa rexeitado pola xente do barrio inda que admirado polos alumnos dunha escola de baile e pronto será o local de moda da cidade. Será quen de manter o espírito do local? Os cambios na súa vida non deixan de sucederse e namora de Lucia, a nova camareira. É imposíbel manter unha relación a distancia? Inda que co recén chegado éxito os problemas co fisco e cos especuladores locais semella que amainaron Zinos non deixa de darlle voltas á idea de vendelo todo e ir a China na procura de Shayn. Com este panorama calquera cousa pode pasar.

O filme é unha comedia ó uso e segue todos os esquemas e gags básicos do xénero. Acompañado por unha poboada colección de secundarios (o irmá de Zinos e os seus amigos, os clientes do bar, os músicos, a inspectora de Facenda, o inspector de Sanidade, o construtor…) o errático camiño de Zinos cara non se sabe moi bem onde amósanos, a través da comedia, varios puntos da realidade (a inmigración, a integración, a especulación urbanística…)

Pode que Soul Kitchen non teña a profundidade das súas outras propostas cinematográficas, máis algunhas cousas son claras: com esta proposta pode chegar a moita máis xente sen traizoar os seus presupostos temáticos e dando de novo espazos para a reflexión. Pero sen dúbida o máis sobresainte do filme é que nos permite soltar amplas gargalladas e sair da sala com bo corpo.

Xa me diredes o que vos pareceu.

Vémonos nas butacas!

ifrit
http://cinemafriki.blogaliza.org

OUTRAS ESTREAS DE MARZO:
5 de marzo:
Los hombres que miraban fijamente a las cabras: Unha hilarante historia sobre as investigacións militares dos poderes paranormais. Baseada en feitos reais.
12 de marzo:
El retrato de Dorian Gray: Nova versión da novela de Oscar Wilde sobre a obsesión da eterna xuventude. Podía facerse moito mellor.
Desde París com amor: Unha de atentados terroristas e carreiras contrareloxo com John Travolta
19 de marzo:
Green Zone. Distrito protegido: Thriller bélico no que un grupo de soldados terá como misión buscar as armas de destrucción masiva iraquís e o que atoparán será un plan que representa unha ameaza inda maior.
Ciudad de vida y muerte: Cinema bélico chinés sobre a invasión xaponesa de principios do século XX. Cuncha de Ouro no festival basco de Donosti 2009.
26 de marzo:
El libro de Eli: Nun futuro post-apocalíptico Denzel Washington deberá protexer o libro que traerá a a salvación á humanidade.
Furia de titanes: Remake do clásico dos 80 cheo de espectaculares monstros e loitas épicas.
Scar: Terror con asasino en serie en 3D. Semella que a peli é tan boa que andan a voltas cas datas (ou era ó revés?)

Artigo publicado no suplemento cultural A soeira das estrelas do xornal En momemento, editado polo Movemento polos dereitos civís, en febreiro de 2010

[A recomendação foi feita sem ter visto o filme e pode conter algum que outro erro]

Un profeta

2011-11-03


Un profeta (2009)
Estrea: 26 de febreiro de 2010

Título orixinal: Un prophète
Director: Jacques Audiard
Intérpretes: Tahar Rahim (Malik), Niels Arestrup (César Luciani), Adel Bencherif (Ryad), Reda Kateb (Jordi), Hichem Yacoubi (Reyeb), Jean-Philippe Ricci, Gilles Cohen, Antoine Basler, Leïla Bekhti, Pierre Leccia, Foued Nassah e Jean-Emmanuel Pagni.
País: Francia
Ano: 2009
Duración: 150 minutos
Xénero: Drama.

Tal como están os prezos dos cines hai que mirar moi e moito o que imos ver. Por iso cada mes vou recomendar aquí, na Soeira das estrelas, un filme dos que, polo xeral, non teñen grandes promocións e, na miña humilde opinión, non deberíades perder.

Comezamos cun título que puidemos ver no festival de Cineuropa 2009 e que tivo bastante boa acollida entre o público. ‘Un profeta’ é unha historia cun amplo trasfondo social, contada con grande soltura e cunhas pingas de fantasía. Os ingredientes perfectos para gustar no festival.

A historia ademáis ten todos os vimbios dun bo filme carcerario. Malik é un mozo descarriado que é condenado a seis anos de cadea non sabemos moi ben porqué. O cárcere está “gobernado” pola mafia corsa, que controla a algúns gardas e as actividades do cárcere. E do outro lado “os barbudos”, os musulmáns, sempre rezando, sempre tranquilos. Nun primeiro momento Malik mantense neutral, a pesar da súa ascendencia norte africana, inda que pronto aprenderá que non se pode ser neutral. Fóra vai ter lugar un importante xuízo contra a mafia corsa e o capo do cárcere pídelle a Malik que asasine ó seu compañeiro de cela, a principal testemuña. Ninguén sospeitará del.

A partir de aquí a súa vida na cadea cambiará e empezará a traballar para os corsos (limpando, cociñando, de mensaxeiro…) E co paso dos anos, cando consegue os primeiros permisos, tamén fará traballos fóra. Mais Malik nunca traballa para ninguén, só traballa para el mismo, e por iso non tardará en empezar a traballar tamén para os musulmáns, que co tempo van gañando poder no cárcere.

‘Un profeta’ ten un guión moi ben estructurado, unha historia que non nos deixa despegarnos da pantalla, unhas actuacións de luxo. E a todo iso hai que sumarlle que non dulcifica o que é un cárcere, non aforra en amosarnos a violencia, as malleiras, as ameazas; todo nun ambiente máis que gris.

Mención aparte merece o actor Tahar Rahim, un actor novel que defende coma un veterano o papel de Malik, un mozo perdido pero seguro de si mesmo e que irá endurecendo co tempo sen perder o corazón.

Vémonos nas butacas!

Artigo publicado no suplemento cultural A soeira das estrelas do xornal En momemento, editado polo Movemento polos dereitos civís, en febreiro de 2010

Fantasporto día 4: Os filmes españois triunfan no Porto

2011-11-03

Dende a República Checa chéganos o primeiro bluff do Festival. Hierro e Rec 2 enchen o auditorio e lévanse sendas salvas de aplausos.

T.M.A. (Juraj Herz, República Checa, 2009)

Juraj Herz é un vello coñecido do Fantasporto e os seus filmes están presentes na programación case dende o primeiro ano (Beauty and The Beast, 1979 ou Ferat Vampire, 1981) Pero é difícil manter sempre o nivel.

Jerz explicou o significado do misterioso título, T.M.A. Que non é outra que un malentendido co seu produtor estadounidense, pois “tma”, significa “escuridade” en chceo e non quería facer outro filme titulado “Darkness”. O filme conta a historia dun músico que decide retirarse da vida da cidade á casa do campo vivia de pequeno para pintar cadros. Pero a casa ten unha longa historia de escuros sucesos, dende a antigüedade, onde se facían sacrificios e rituais, ata a Segunda Guerra Mundial, onde a SS se estableceu para controlar a zona. Marek, o protagonista, perdeu ós seus pais nun accidente do que non recorda nada e a súa irmá está internada nun psiquíatrico polo shock sufrido. Os aldeanos amósanse reticentes a tratalo e só atopará apoios na bela carteira e no vello bibliotecario. Todos agochan máis de un segredo.

Cuns vimbios que teñen funcionado sen problema en moitas outras fitas, unha realización máis que correcta e actores e actrices decentes T.M.A. falla no guión e amósanos unha chea de historias cruzadas creando un sarillo que remata por ser ridículo e dar vergonza allea.

Gracias Juraz polo teu traballo pero a próxima vez búscate a outro que non sexa Martin Nemec (guión e música, xusto o máis frouxo do filme)

Hierro (Gabe Ibáñez, España, 2009)

Hierro conta a historia dunha mai que perde ó seu fillo nunha viaxe en ferry e despois tolea e pasa os días a buscalo pola illa de El Hierro.

Escaso argumento para 90 minutos. O filme é unha gozada visual polas salvaxes paisaxes da illa, a realización e os efectos especiais todo acompañado por unha banda sonora case épica obra de Zacarías M. de la Riva.

Bonito continente, escaso contido.

REC 2 (Paco Plaza e Jaume Balagueró, España, 2009)

Como xa fixera anteriormente La Horde o sábado pasado REC 2 esgotou os billetes e encheou o auditorio grande do Teatro Tivoli de espectadores que devecían por ver sangue e zombis.

Non vou falar de REC 2, estreada en Galiza a principios de outubro do ano pasado, xa está case todo dito. Só dicir que o público do Fantasporto disfrutou inmenso, como se tratara dunha comedia. Paco Plaza e Jaume Balagueró deulles o que gustou da primeira parte multiplicado por catro, dándolle unha volta á porca do humor e engadindo algún que outro ingrediente novo.

Tranquilos, haberá terceira parte.

Vémonos nas butacas!

Artigo publicado en GZnación e Nova Fantasía.

Categories : Cinema  Cinema  GZnación

Fantasporto día 3: A outra cara do terror coreano

2011-11-03

Pagando os excesos. Unha historia de posesión cos característicos toques da cultura coreana. A carreira de Christian Slater, en caida libre, intenta erguer a cabeza interpretando ó vilán dun relato de Stephen King.

Cinco longametraxes, unha curta e unha conferencia de prensa. O corpo dixo basta e houbo que facer un descanso. Voluntariamente deixei de ir ver Valhalla Rising, da que non tiña moi boas críticas e despois descansei durante o pase de T.M.A (co director presente) e de Air Doll. Hai que dosificarse para poder estar a todo.

Possessed (Lee Yong-Joo, Corea, 2009)

Unha rapaza desaparece e mentras a súa irmá e un policía intentan atopala a súa nai, fanática católica, decide que o mellor é pregar para que volva. O que parece o caso dunha adolescente que fuxe da casa vaise complicando cas descubertas de feitos estraños no predio e cos estraños suicidios dos veciños.

Comedido, tranquilo e detallista, Possessed é un filme de medo puro, que enfronta as crenzas máis ancestrais cos medos máis diarios. Pouco a pouco, case sen nos enterar, imos entrando nunha historia da que xa non poderemos escapar.

Dolan’s Cadillac (Jeff Beesley, EUA e Reino Unido, 2009)

Unha muller ve como uns mafiosos matan a outra muller que intenta escapar dun transporte transfronteirizo para a prostitución. Inda que consegue fuxir na carreira perde o móbil e cando decide testificar contra eles morre por unha bomba que lle colocaron debaixo do coche. O seu home, un profesor de secundaria, e unico estadounidense que non é capaz de levar a cabo unha sanguenta vinganza cunha Dessert Eagle, fica destrozado. Pero tranquilos, que algo se lle ocorre.

Baseado nun relato de Stephen King atopamos un filme de vinganza que evita os típicos clichés do xénero e pregúntanos “Que farías ti nesta situación?” e sen ser un relato de terror non deixa de estar detrás Stephen King.

Christian Slater interpreta ó Dolan do título, un mafioso cruel e violento, que no seu Cadillac blindado adícase á trata de brancas na fronteira entre México e os EUA. Un bo intento para que nos esquenzamos de que fixo Alone in the Dark, pero moito o vai ter que seguir intentando.

Isto non para!

Vémonos nas butacas!

Artigo publicado en GZnación e Nova Fantasía en 2010.

Categories : Cinema  Cinema  GZnación

Fantasporto día 1. Inauguración e entrando en matéria

2011-11-03

Críticas ó centralismo lisboeta nos discursos da organización e de apoio incondicional no da Ministra de Cultura. Comezamos o festival com espada e bruxería, vingaza muda e pinku eiga indescriptíbel.

É inevitábel. A cousa ten que comezar así. Os discursos e entregas de premios teñen que ter o seu sitio neste tipo de eventos, inda que a xente estea alí para deborar cinema.

Beatriz Pacheco Pereira, directora do festival, comezou o seu discurso en inglés acompañada dos robots da sección de robótica e cinema (no hall do teatro estaba o robot máis sofisticado da actualidade, que pode decidir o que facer e amosar sentimentos) para logo dun tempo pasarse ó portugués e dar os agradecementos (entre eles á presente Sra. Ministra de Cultura Gavriela Canavilhas), facer unha dura crítica do centralismo lisboeta e a discriminación do norte, repasar o amplo programa e rematar loubando ó publico do Fantas.

Tamén pasaron polo escenario o Presidente do festival, Mário Dorminsky, a Ministra de Cultura, os organizadores da sección de robótica e cinema e máis da de efectos especiais, para acabar con Samuel Hadida e Michael J. Basset, produtor e director respectivamente do filme Solomon Kane. Basset, nunha chiscadela ó publico de alguén que disfruta do cimena, fixo unha intervención bem curta dicindo que estabamos alí para ver cinema, non para falar.

Apaguen as luces e deixen a maxia voar…

Solomon Kane (Michael J. Basset, Francia/ República Checa, 2009)

A personaxe ten todos os ingredientes dun relato de espada e bruxería e o director, que tamén é o guionista, sabe explotalos para relatar unha historia nova. A verdade que poucas cousas quedan por inventar neste xénero e Basset non o intenta, senon que aproveita os seus coñecementos e as convencións do xénero para facer un filme case redondo. Non é un filme perfecto, mais si que está bem feito e utiliza correctamente todas as ferramentas á súa man.

Solomon Kane é a historia dun nobre segundón condenado a perder a alma por un enfrontamento co Demo e que decide levar unha vida pacífica para evitar condenarse definitivamente. Pero na inglaterra do século XVII, arrasada pola peste, é difícil vivir en paz, e inda menos dende que chegou á zona un malvado feiticeiro chamado Malachi, que impón a súa lei alí por onde pasa, os fortes para o seu exército, os febles os seus escravos. Así que xa a temos montada e Kane deberá volver a coller as súas espadas, a costa da súa alma.

Loitas a espada, monstros e demos, zelotes relixiosos, malvados feiticeiros e lama, moita lama, deixarán máis que satisfeitos ós afeccionados do xénero.

Sweet Karma (Andrew Thomas Hunt, Canadá, 2009)

O filme que faría Quentin Tarantino en vez de Kill Bill se o único filme que tivera visto fora Thriller: A Cruel Picture (Bo Arne Vibenius, 1974) e o seu gusto musical estivera totalmente atrofiado.

Unha moza rusa muda ten noticia de que a súa irmá que foi traballar a Canadá foi enganada para traballar de prostituta e finalmente asasinada. Comezará entón unha salvaxe vinganza contra todos os implicados.

Un filme duro de ver, empezando polo tema da trata de brancas, seguindo pola particular maneira de rodar elexida polo director e rematando pola machacona música que acompaña gran parte da metraxe. Podemos relaxar a vista co escultural corpo da protagonista, a ex-modelo Shera Bechard.

Só recomendada para fans do cinema com grumos.

Tandem (Toshiki Sato, Xapón, 1994)

E chegamos ó pinku eiga do día, onde a palabra “bizarro” queda curta.

Dous homes coinciden nun bar de mala morte onde todo o tempo soa música clásica e, bebendo café, teñen fantasías sexuais. Despois de intercambiar tabaco un insiste en acampañar ó outro na súa moto nunha viaxe sen sentido e chea de momentos delirantes pola cidade adiante, mentres seguen dando renda solta á súa imaxinación e mantendo relacións dominantes com canta muller se lles mete no maxín.

Dicir que este é un filme porno é quedarse corto e esaxerado. Corto porque o humor delirante e as historias cruzadas non son as propias dun filme porno. E esaxerado porque o pinku eiga caracterízase, entre outras cousas, por amosar relacións sexuais sen ensinar xenitais nin vello púbico, co que o único que temos é a un par de xaponeses poñendo caras esforzadas e retorcéndose nas máis diversas posturas e a raparigas berrando e laiandose cos característicos sons orientais. Todo isto, como xa digo, intercalado com escenas de humor delirante e cunha banda sonora totalmente intrusiva e sen sentido.

Señores e señoras, isto é o pinku eiga. Están avisados. Non sei se se van excitar, pero pór caras de sorpresa e botar unhas boas risas fixo que si.

Isto está que bota fume. Vémonos nas butacas!

Artigo publicado en GZnación e Nova Fantasía en 2010.

Categories : Cinema  Cinema  GZnación